濕疹成因

相信好多還有濕疹嘅朋友都睇過醫生，不論中醫西醫或者喺網上查過好多資料，嘗試搵出濕疹嘅病因，但係通常搵到嘅答案都係：

天氣：醫生都會話係秋天冬天或者轉季嘅時候，大部份人嘅濕疹特別嚴重。因為天氣特別乾燥而且適應唔到天氣嘅轉變。（鬼唔知啊媽係女人）

中醫：中醫通常都會叫你戒口包括：牛、羊、鵝、鴨、雞蛋、海鮮。幾萬樣野。係幾萬樣野，最搞笑係佢哋從來都冇對症下藥，因為你就算睇其他病佢都係叫你戒口唔好食呢啲。我曾經試過比個中醫叫戒食生果，因為生果食得多會濕熱。

如果你曾經睇過中醫你都知，佢一定話你濕毒，濕氣重，要飲多啲去濕嘅嘢。睇到連我阿媽都識得講你濕氣重呀。發燒，你都係濕氣重呀。

西醫：基本上冇戒口嘅概念，佢哋只會話你對某種食物或者藥物敏感，如果食左有敏感情況以後就唔好食啦。佢地都會認為係免疫系統失調，由情緒同壓力而引起濕疹，亦都可能有遺傳性。而佢哋唔認為濕疹係一種皮膚病，因為係佢哋角度呢個係一個免疫系統過度反應。病發嘅時候：主要係受外界環境誘因，例如：天氣轉變、壓力、情緒、環境改變等等而刺激免疫系統所致。（基本上又係講曬，無病因）

當白血球和不同種類的免疫蛋白對外界刺激產生過度反應，並表現於皮膚上，便會出現皮膚紅、腫、痕癢甚至滲出分泌物等濕疹症狀。

自然療法：係自然療法裏面佢哋通常講話你身體毒素太多，即使你有其他慢性疾病佢哋都一樣可以話你身體毒素太多。濕疹只係一個症狀，就係嗰啲毒素透過皮膚而展現出來。如果你有大腸癌，大腸癌亦是一個症狀，只係啲毒素去咗大腸度。（我反而自己比較傾向相信呢個講法）

到最尾翻查過好多資料，我發覺濕疹或者其他好多慢性疾病都係搵唔到原因嘅，又或者可以咁講，呢啲慢性都係因為你平時嘅飲食、作息、壓力、體質，種種因素加起上嚟嘅一個結果。正如好多人食煙飲酒去到80幾歲都冇事，但係有啲人30幾歲已經生cancer，以現今醫學係拉唔到原因嘅。